Olympic Distance Triathlon

و الذي كان في يوم السبت 26-05-2018 . حبيت اشارك وياكم تجربتي بالسباق و الذي يتكون من ٣ اجزاء؛ السبح (١.٥ كم)، ركوب الدراجة الهوائية (٣٧كم) و الركض (١٠كم). الوقت المسموح لنكمل بي كل الاجزاء هو عادة ٣ ساعات فاذا احد المتسابقين كان غير قادر على تكملة كل الاجزاء خلال هذا الوقت، يخرج من السباق..

العام الماضي شاركت بهذا السباق لكن بمكان مختلف و المسافة كانت اقصر بكثير (٥٠٠ متر سبح، ٢٧ كم ركوب  الدراجة الهوائية و الركض 5 كم). كنت بوقتهه داسوي ويا احدى مريضاتي و الي كانت  دتتشافى عندي بعد عملية فتق بالظهر و كنا بالاشهر الاربعة قبل السباق مركزين على تقوية العضلات و تحسين اللياقة البدنية. فكهدف جميل لها قررنا نشارك بالسباق لكن هدفنا  كان مجرد اكمال السباق… الوقت كان غير مهم! و كان مسموح لنا نطول بالسباق شكد منريد فكنا ماخذين راحتنا و سوينا السباق على حسب استطاعة مريضتي. بصراحة كان السباق سهل جدا بالنسبة الي و ما حسيت بأي تحدي و لذلك قررت اسوي السنة القادمة المسافة الاولمبية.

بالحقيقة كنت بالاسبوع الماضي قلقة عالسباق. هل تدربت و اكلت بما فيه الكفاية؟ هل اكلت كل ما يحتاجة جسمي من فيتامينات و معادن و كاربوهيدرات و بروتينات… الخ؟ هل شربت ماء كافي يوميا؟ زين و تعب الشغل حيأثر عالسباق؟ هل حصلت على نوم كافي يوميا… كل هالاشياء لها تاثير كبير جدا على لياقتي بيوم السباق!

بيوم السباق كان ريوكي ثلاث فطائر مع الفراولة و الموز و القليل من اللبن و شرب لتر و نصف ماء خلال فترة  الصباح.

كان مطلوب انه نكون هناك قبل ساعة و نصف من السباق لغرض التسجيل و التحظير و الاحماء و الذي تكون من:

ركض ٢كم

Stretching exercises

Mobility exercises

10 burpees

20 mountain climbs

40 jumping jacks

وراهه بلش السباق بالسبح… انطونا تعليمات عن طريق السبح و قلت ويا نفسي ها بسيطه هاي ال 1.5كم لكن بعدها ضافو: و هذا الطريق تعيدو 3 مرات! اني فزيت و فكرت😂😲😂

طبعا السبح كنت خايفة منه اكثر شي لان ولو كنت طول عمري سباحة جيدة، بعمري مماخذة دروس سبح لتعلم التقنية الصحيحة و ايضا لقلة الوقت خلال الاسبوع، مكدرت اتدرب عالسبح بكثرة. سبحت مرات قليلة جدا بالمسبح و مرة وحدة اكملت ال1.5كم! لكن هالمرة كان السبح بالماء المفتوح و بعدها مباشرة لازم اركب البايسكل لمدة ساعة و ربع على الاقل و اركض 10 كم.

طبعا اول مبلش السباق صار ضباب بنظارات السبح و مكدرت اشوف طريقي زين فاضطريت اتخلص منهه خلال السباق حتى اكدر اركز عالسبح و خصوصا انه اكثر المشاركين عندهم سرعة سبح خرافية… اسرع واحد كمل ال١.٥ كم خلال ١٨ دقيقة!! المهم اني كملتهه اعتقد خلال ٤٠ دقيقة لان النتائج بعدهه غير معلونه. من طلعت من المي و صعدت عالحشيش رجليناتي صار بيهه ثقل و احتاجيت كم ثانيه اتعود عالمشي و ركضت بسرعة للبايسكل، اخذت غراضي و بلشت بالجزء الثاني…

كان الهواء عالي فعرفت حيكون الجزء الثاني صعب ايضا. التعليمات كانت انه نسوي ٥ دورات من جديد و لمدة ٣٧ كم… اول دورتين قلت لنفسي كلش زين عفية كملي هيج لان كانت سرعتي ٣٠كم بالساعة. لكن بعدها صار عندي تشنج بعضلة الظهر اليسرى و خدر بعد معرفت شلون اكعد عالبايسكل لكن قلت هذا الشي محيوقفني… الهواء العالي كام يزيد و رجليناتي تتعب اكثر و اكثر الى ان بأخر دورة نزلت سرعتي لل٢٠ كم بالساعة لكن قلت مو مشكلة اخر وحده اوصل هم ميخالف المهم اكمله… لكن حسيت انه المسافة كانت اكثر من ٣٧ كم و صار عندي بصراحه ملل 😂 شو طولت زايد عن اللزوم!! و فعلا بعد السباق سمعت انه سباق البايسكل كان ٤٢ كم و ليس ٣٧كم فاحساسي كان بمكانه 😂.

من وصلت لاخر جزء و هوه الركض و نزلت من البايسكل… كان شعور جدا غريب… الاحساس برجلي اختفى و كانه واحد ماعندة تنسيق بالحركة. و هذا الشي جنت متوقعة حيصير لان اعرف انه اكثر المتسابقين يصير بيهم هذه الظاهرة بين جزء البايسكل و جزء الركض لكن المزعج هو انه ولو كنت حابة اكمل السباق للاخير كنت غير متاكده اذا حيسمحولي اخذ وقت اكثر من ٣ ساعات بالمجموع. هذا الشي سببلي التوتر والإحباط و أثر على نفسيتي خلال السباق.وصلت لاخر جزء و هو الركض… مشيت اول ٢٠٠ متر بينما تتعود رجلي عالمشي و اشرب ماء و اكل شريط الطاقة و الي يعطي الجسم طاقة سريعه. كملت اول ٥كم و من وصلت بقرب زوجي كالي يالله عندج ٢٥ دقيقة لازم تكملين اخر ٥كم خلال هذا الوقتdo your best!!

من دا اركض قلت لنفسي ٥كم عادة اسويهه خلال ٢٣ دقيقة لكن هسه رجلي فرغت من الطاقة و ركضي صار بطيئ جدا ٧.٥ دقيقة بالكيلومتر الواحد 😂.

قلت لا محتدبر فحكمل هال٢.٥كم و وراهه اوقف السباق المهم جربت و كانت تجربه حلوه… من وصلت يم زوجي كتله مالحك اكمل عالوقت فحوقف… كال لالالا كملي لنفسج يالله مبقى شي دقايق و تخلصين… اني صرت 🤗emotional😭

ل

قررت بس اوصل لخط النهاية ابجي 😂😭 لان فعلا انجاز كبير بالنسبة الي و اكبر انجاز سويته على المستوى الرياضي.

من كنت بالدورة الاخيرة شفت متسابق ديمشي كدامي… كان ايضا عنده صعوبه بالركض. قلت ها اذن اني مو اخر وحده و هذا اكدر الحك بي  بلكي نكمله سوه… من وصلتله وقف و كام يمشي كتله يالله يالله اركض نكمل سوه… كالي لا شكرا انتي كملي كود لاك… جان هم معصب و ضايج مثلي😂

صار اتصال بين الهيئة الديمشون ويانا عالبايسكل و بين الحكام… قالولهم اخر ثنين وصلو تقريبا لا تسدون السباق. طبعا كلش تشكرت منهم لان جنت كلش اريد اكمل للاخير.

وصلت لل finish و كان شعور لا يوصف… بس الي مسوي هيج سباقات يعرف شنو معنى وصل لل FINISH line😂😭.

طبعا صرت مشهورة بالسباق… رند النجم الانكليزية من ليواردن 😂 لان كنت لابسة تيشيرت مكتوب علية لندن و الكل يحجون ويايا بالانكليزي ميدرون احجي هولندي 😂. اجوي صافحوني و باركولي لان حسو بتعبي و ارادتي باكمال السباق مهما يكن.

طبعا نمت البارحه ٩ ساعات و حاليا الوجع الوحيد العندي هو وجع بلاعيم و حساسية جلدي للشمس. استغربت انه بلاعيمي تاذيني فقريت عن هذه المشكله و شفت انه هوايه تصير عدهم لكن السبب مواضح… ممكن يكون تعب، او بسبب التنفس الكثيف لمدة طويلة او بسبب السكريات المكثفة بال energy bars and gels.

ما عندي اي تشنج او وجع عضلات لكن اعتقد حيبلش اليوم العصر لان تكون مرت عالاقل ٢٤ ساعة عالتدريب  و اسم الظاهرة (Delayed onset muscle sorenes (DOMS

ولو طولتهه عليكم بس اريد اقوللكم ليش اني سويت السباق… اهمية انه الواحد يشتغل لهدف معين و ينافس نفسه مو غير احد شي جميل جدا و ينطي دافع كبير جدا انه يبقى يتدرب و يحسن من لياقته. ولو ما اعتقد انه حشارك بسباقات اصعب من هذا السباق اريد المرة الجاية اسوي بسهولة اكثر و وقت اقل. فهذا الشي ينطيني دافع للتدريبات القادمة حتى احسن لياقتي اكثر و احسن تقنيتي بالسباحة. قبل تقريب ال٦ سنوات مكنت قادرة اركض اكثر من دقيقة او دقيقتين باستمرار لكن التدريب المستمر و الدافع انه احسن لياقتي البدنية خلاني اوصل لل fitness level الي وصلتله اليوم.

مهما كان عمركم او درجة لياقتكم البدنية و بمشاكل او بدون مشاكل صحية كونو واثقين انه اكو شي تكدرون تسوو حته تحسنون من صحتكم و هذا هو هدفنا الاكبر في بروهيلث ٣٦٥  انه نساعدكم اني و الدكتورة ورد النجم انه تكتشفون نقطة الابتداء وين لازم تكون و شلون تكدرون تبنون تدريباتكم و تحسنون من غذائكم حتى نشتغل على هالنقاط سوه و حتى نساعدكم توصلون لاهدافكم الصحية و الرياضية. فما هو هدفك البدني؟ تنقيص ١٠كيلو؟ ركض ١٠ دقايق مستمرة؟ تحسين قوة عضلات الساقين؟ شاركونا باهدافكم و احنا ننطيكم نصائح تساعدكم توصلون لها.

اتمنالكم الصحة و العافية و تحياتي للجميع.

رند النجم

2 ردود
  1. احمد الحمداني
    احمد الحمداني says:

    والله اني دا اقرة ومتحمس ويه شرحج المفصل المشوق وخصوصا الاصرار على اتمام المهمه وآلية التفكير بكيفيه الوصول للنهاية بشكل رااااائع واحساس النجاح والانجاز بالحقيقه لايوصف
    فالف الف مبروك

    رد
  2. Nashwah
    Nashwah says:

    تستحقين ان تفتخري بهذا الانجاز الرائع يا بنت العراق العظيم الولّاد وان شاءالله في المستقبل تنجزين المهمة بأقل من الوقت المحدد وتكونين من الاوائل يا فخرنا.

    رد

اترك رداً

Want to join the discussion?
Feel free to contribute!

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *